[74] (ก) เย เกจิ อพฺยากตา ธมฺมา, สพฺเพ เต อพฺยากตมูลาติ?

ตีเณว อพฺยากตมูลานิฯ อวเสสา อพฺยากตา ธมฺมา น อพฺยากตมูลาฯ

(ข) เย วา ปน อพฺยากตมูลา, สพฺเพ เต ธมฺมา อพฺยากตาติ? อามนฺตาฯ

[75] (ก) เย เกจิ อพฺยากตา ธมฺมา, สพฺเพ เต อพฺยากตมูเลน เอกมูลาติ?

อเหตุกํ อพฺยากตํ อพฺยากตมูเลน น เอกมูลํฯ สเหตุกํ อพฺยากตํ อพฺยากตมูเลน เอกมูลํฯ

(ข) เย วา ปน อพฺยากตมูเลน เอกมูลา, สพฺเพ เต ธมฺมา อพฺยากตาติ? อามนฺตาฯ

[76] (ก) เย เกจิ อพฺยากตมูเลน เอกมูลา ธมฺมา, สพฺเพ เต อพฺยากตมูเลน อญฺญมญฺญมูลาติ?

มูลานิ ยานิ เอกโต อุปฺปชฺชนฺติ อพฺยากตมูลานิ เอกมูลานิ เจว อญฺญมญฺญมูลานิ จฯ อวเสสา อพฺยากตมูลสหชาตา ธมฺมา อพฺยากตมูเลน เอกมูลา, น จ อญฺญมญฺญมูลาฯ

(ข) เย วา ปน อพฺยากตมูเลน อญฺญมญฺญมูลา, สพฺเพ เต ธมฺมา อพฺยากตาติ? อามนฺตาฯ

(2) มูลมูลนโย

[77] (ก) เย เกจิ อพฺยากตา ธมฺมา, สพฺเพ เต อพฺยากตมูลมูลาติ?

ตีเณว อพฺยากตมูลมูลานิฯ อวเสสา อพฺยากตา ธมฺมา น อพฺยากตมูลมูลาฯ

(ข) เย วา ปน อพฺยากตมูลมูลา, สพฺเพ เต ธมฺมา อพฺยากตาติ? อามนฺตาฯ

[78] (ก) เย เกจิ อพฺยากตา ธมฺมา, สพฺเพ เต อพฺยากตมูเลน เอกมูลมูลาติ?

อเหตุกํ อพฺยากตํ อพฺยากตมูเลน น เอกมูลมูลํฯ สเหตุกํ อพฺยากตํ อพฺยากตมูเลน เอกมูลมูลํฯ

(ข) เย วา ปน อพฺยากตมูเลน เอกมูลมูลา, สพฺเพ เต ธมฺมา อพฺยากตาติ? อามนฺตาฯ

[79] (ก) เย เกจิ อพฺยากตมูเลน เอกมูลมูลา ธมฺมา, สพฺเพ เต อพฺยากตมูเลน อญฺญมญฺญมูลมูลาติ?

มูลานิ ยานิ เอกโต อุปฺปชฺชนฺติ อพฺยากตมูลานิ เอกมูลมูลานิ เจว อญฺญมญฺญมูลมูลานิ จฯ